بداية الموضوع ( الحب ) معاك او معاكى او حتى معايا انا - يعنى مشوا حالكوا وخليكوا فريش
هنبدأ من اول ما بيشوفوا بعض
هى جاية من بعيد وانت متابعها
واول ما تعدى جنبك تبعتلك رمش يرشق فى قلبك ذى السيف
بس انت لسه مش واخد بالك
واول ما تروح البيت وتحاول تنام يحلف عليك النوم ما هو مقرب منك ..
تعمل كل اللى ربنا يقدرك عليه عشان تعرف تنام .. مفيش فايدة تفضل تفكر وتفكر ....
تفتكر عنيها - ضحكتها - حركاتها - مشيتها - اسلوبها فى الكلام - طريقة تفكيرها
يا سلااااام هى دى اللى فضلت عمرك كله تدور عليها وملقيتهاش غير فى البنوتة دى
وسط كل التفكير ده كله تلاقى نفسك بتغرق فى النوم ...
على طول يجى رمشها اللى رشق فى قلبك ذى السيف مزغزك كده تروح صاحى علطول ..
تلاقى الفجر بيأذن تقوم تصلى الفجر طبعا اذا كنت بتصلى
وبعدين تروح تنام تانى ...
بس المره دى قلبك هو اللى حالف عليك بالطلاق بالثلاثة ما انت نايم ولا شايف النوم الا ما تكلمه وتعرف هو ماله ...
مالك يا قلبى ؟؟؟؟؟
تلاقيه فرحان ونازل رقص من الانبساط اللى هو فيه وطبعا عشان لقى اللى كان بيدور عليها طول عمره .....
وعلى طول الاشارة تروح للعقل ان القلب فرحان العقل يصدر قراره فورا برضه انه يراقبها عشان تتأكد من صدق مشاعرها ....
وتلاقى نفسك بتمر عليك كدا لحظات مش ورا بعضها تدوق فيها حلاوة القرب منها وتتأكد ان هى دى اللى فضلت تحلم بيها طول عمرك
خلاص انت اتأكدت من كل حاجة على طول تقرر بقى انك تقولها على اللى فى قلبك
الاول تلمحلها وهى مفيش. تلمح اكتر وهى عامله فيها عم العبيط اللى مش واخد باله ..
.لحد ما تصادف مره كدا وتجيلك الشجاعة وتقرر انك تقولها مباشرة من غير لف ودوران ويجى اليوم وتقولها .......
بحبك يا فوزية ... علطول وبمنتهى البساطة ترد عليك وانا كمان .... بحبك يا فوزى بس ذى اخويا ........هههههههههههههه
تنزل عليك الكلمة ( اخويا ) ذى ما يكون شيكارة اسمنت وقعت على نفوخك من الدور السبعتاشر او قالب طوب اترزع فى وش حضرتك .........
بس هتعمل ايه يا مسكين ؟؟؟؟؟؟؟
طبعا لانك اتدهولت على عينك وحبتها ووقعت على جدور رقبتك ومحدش سمى عليك هتقبل وهتمشي امورك وتتعامل على انكم اصحاب
ولما تصادف تانى وتقولها انا لسه بحبك وقلبك بيدق اوى ووشك جايب الوان الطيف السبعتاشر برضه ......
تلاقيها هى ولا هنا كأنك بتتكلم مع حته تلج ( برود قاتل )
وقتها انت هتفهم بقا يا معلم انها مش فارق معاها وانها بايعة القضية خااااااااااااالص ...
لحظة هشوف حاجة اشربها وارجع اكمل اوعو تمشوا
( فاصل ونواصل ) انا جيت وجبت قهوة زيادة اتفضلوا.... العفوا ....
المهم كنا بنقول انك لقيتها بايعة القضية على طول انت هتسود الحياة فى عينك والدنيا تفضل تلف بيك
وفجأه تلاقى نفسك على السرير مقضيها cD Player وطبعا هتشغل فى يوم... فى شهر .. فى سنه .. ورميت الورد .. طفين الشمع يا حبيبى ..
واغانى كدا من هذا القبيل تيجى امك تتحايل عليك تمسك كتاب وانت متنح عالآخر
ابوك يبوس ايدك عشان امتحناتك قربت وانت مهيس خاااااااالص ولا هنا اصلا
تنزل من عينك دمعة تقولك انساها حرام عليك نفسك انساها ونام وريحنى
تغمض عنيك شوية عشان تنام وتحاول تنسى واول ما تيجى تنام يرن صوت محمد فؤاد فى ودانك خسارة فيك قلبى خسارة فيك حبى وخسارة ابكى عليك .....
يجى الكلام على الوتر الحساس ..........
يروح رمشها اللى رشق فى قلبك ذى السيف مزغزك كدا تانى تروح صاحى على طول مش هتقدر تنسى طيب هتعمل ايه يا متنيل على عينك او متنيله على عنيكى فى الحالة دى ؟
_________________
الإثنين سبتمبر 03, 2007 12:35 pm